Трговците во источниот дел на Австрија негодуваат поради повторно воведениот карантин од први до шест април, наведувајќи дека тоа ќе ги чини пола милијарда евра.
Четвртиот карантин и повторното затворање на сите продавници, освен прехранбените, во покраините Виена, Долна Австрија и Бургенленд, за трговците е вистински кошмар.
Во источниот дел на Австрија 10.000 работни места повторно ќе бидат затворени, а ќе има и големи загуби.
Продавниците за облека и обувки само што ги набавиле пролетните колеции и очекувале добар промет пред велигденските празници, но одлуката за затворање повторно тешко ги погодува.
Новиот карантин, според трговците, ќе ја загрози егзистенцијата на продавниците, но и на вработените, а освен врз материјалната состојба, ќе има големо влијание и врз нивното психичко здравје.
