Преносот на податоци меѓу ЕУ и САД преку Фејсбук и Инстаграм може да престане во мај. Одлуката нема веднаш да влијае на другите големи американски технолошки компании. Ова беше наведено во интервју за регулаторот за заштита на податоците во Ирска.
Судот на правдата на Европската унија во 2020 година пресуди дека пактот за пренос на податоци меѓу ЕУ и САД е неважечки. Причината – сомнежите дека системите за следење на американската влада можеби не ги почитуваат правилата за приватност кои важат во ЕУ.
Ова ја поттикна ирската Комисија за заштита на податоци (DPC) да издаде привремена забрана во која се наведува дека механизмот што Фејсбук и Инстаграм го користат за пренос на податоци од корисници во Европската унија во САД „не може да се користи во пракса“. Наредбата беше замрзната по судска жалба. Сепак, таа беше обновена минатиот мај, кога ирскиот Врховен суд ги отфрли тврдењата на Мета.
Сега е јасно дека ажурираната одлука за оваа наредба може да се појави во април и таа може да се сподели со другите регулатори за заштита на податоците на ЕУ. Ако ниту еден од нив не се спротивстави, „најрано време кога можеме да донесеме конечна одлука може да биде крајот на мај“, изјави портпаролката на DPC, Хелен Диксон за Ројтерс. Секој приговор може да ја одложи одлуката за неколку месеци.
Постапката важи само за Мета. Ова значи дека одлуката нема автоматски да го запре преносот на податоци меѓу ЕУ и САД од страна на други големи американски технолошки компании. Одлуката што DPC на крајот ќе ја донесе во однос на Facebook/Meta ќе биде специфична за Facebook/Meta и ќе се однесува само на неа, објасни Диксон.
Одлуките на ирската Комисија за заштита на податоците се од големо значење, бидејќи токму во Ирска се наоѓа европското седиште на повеќето големи, мултинационални технолошки гиганти. Од друга страна, правната рамка за заштита на личните податоци во Ирска ја одразува онаа на Европската Унија.
По пресудата на Судот на правдата на Европската унија, ќе треба да се донесат поединечни одлуки за секоја поединечна американска компанија, соопшти ирскиот регулатор за податоци. Има „стотици илјади предмети“ кои ќе треба да се разгледаат. Најверојатно ќе започне со „другите големи интернет платформи“.
