Националната кинеска валута влегува во кошницата на валути за специјални права за влечење (СПВ), соопшти Меѓународниот монетарен фонд (ММФ).
Ова е за прв пат по повеќе од 15 години да се најде нова валута што ги сочинуваат специјалните права за влечење на ММФ. Со оваа одлука, кинескиот јуан (ренминби*) се приклучи на американскиот долар, британската фунта, јапонскиот јен и еврото.
“Одлуката на Извршниот одбор на ММФ да ја вклучи Кина во специјалните права за влечење е важна пресвртница во процесот на интеграција на кинеската економија во глобалниот финансиски систем. Исто така, претставува признание за напредокот на кинеските власти коишто во изминатите неколку години спроведоа значајни монетарни и финансиски реформи во земјата“, изјави Кристин Лагард, извршната директорка на ММФ.
Кошницата на СПВ ќе биде: 41,73% за долар, 30,93% за евро, 8,09% за фунта и 8,33% за јен. Јуанот ќе се приклучи од први октомври следната година и ќе има 10,92% удел.
СПВ е посебна меѓународна резерва на средства, што ја создаде ММФ во 1969 година, како дополнување на официјалните девизни резерви на земјите членки на фондот. Составот и вреднувањето на СПВ се ревидира на секое пет години, за да го утврди релативното влијание на валутите во глобалната трговија и нивните финансиски системи.
*ренминби е официјалната валута на Народна Република Кина и во превод значи “народни пари. Нејзиниот интернационален симбол е CNY (CNH in Hong Kong, кратенката е RMB, со симболот ¥).
