Индиецот Гаутам Адани го престигна својот сонародник Мукеш Амбани и сега е најбогат човек во Азија.
59-годишниот основач на Adani Group контролира компании во широк опсег на области, од пристаништа и вселена, до топлина и јаглен, а неговото богатство сега изнесува 88,5 милијарди долари, според индексот на милијардери на „Блумберг“.
Како и другите милијардери ширум светот, богатството на Адани, исто така, значително се зголеми за време на пандемијата. Неговото богатство беше проценето на помалку од 40 милијарди долари пред една година. На овој начин го престигна индискиот енергетски и технолошки магнат Мукеш Амбани и сега е десетти најбогат човек на светот.
Акциите на Adani Group се покажаа исклучително добро за време на пандемијата.
Акциите на Adani Enterprises се зголемија за повеќе од 1.000% на берзата во Мумбаи од јуни 2020 година, што е знак дека инвеститорите се оптимисти за способноста на Адани да се обложува на сектори како што се инфраструктурата и обновливите извори на енергија, кои се клучно значење за постигнување на економските развојни цели на премиерот на Индија Нарендра Моди.
Амбани, кој го контролира конгломератот Reliance Industries, сега е 11-ти најбогат човек во индексот на милијардери на „Блумберг“ со лично богатство проценето на 87,9 милијарди долари.
Ова не е единственото поместување на рангирањето на милијардери во последните денови. Минатата недела, акциите на Меtа, компанијата зад Facebook, забележаа историски пад на цената што збриша повеќе од 30 милијарди долари од личното богатство на Марк Закерберг, кој сега е на 13-то место меѓу најбогатите луѓе во светот.