Одбележувајќи ја седмата последователна година на раст, продажбата на 100-те најголеми светски производители на оружје достигнa 592 милијарди долари во 2021 година, објави во понеделник Институтот за истражување на мирот во Стокхолм (СИПРИ), јавува Anadolu Agency (AA).
Најдобрите 100 компании за оружје во светот продале тешко оружје и воени услуги во вредност од 592 милијарди долари во 2021 година, што е за 1,9 отсто повеќе од претходната година.
Зголемувањето е повторно повисоко отколку во 2020 година, но под просечното зголемување во четирите години пред пандемијата на коронавирус.
Соединетите Американски Држави (САД) продолжуваат да бидат домаќини на најголемиот број компании рангирани во првите 100, бидејќи продажбата на оружје од 40 американски компании изнесува вкупно 299 милијарди долари.
Од 2018 година, пет од најдобрите компании се лоцирани во САД, додека една британска и четири кинески компании остануваат во првите 10.
Првата компанија на листата беше Lockheed Martin, чија вкупна продажба минатата година изнесуваше 60,34 милијарди долари, а потоа следат Raytheon Technologies (41,85 милијарди долари) и Boeing (33,4 милијарди долари).
Од топ 100 компании, 27 беа со седиште во Европа, а нивната комбинирана продажба на оружје изнесуваше 123 милијарди долари. Луси Беро-Судро, директорка на програмата за воени трошоци и производство на оружје на СИПРИ, рече дека проблемите со синџирот на снабдување имале сериозно влијание врз продажбата на оружје минатата година.
Во однос на руско-украинската војна, во извештајот се наведува дека производството на оружје од руските фирми е зголемено, и покрај проблемите поврзани со пристапот до полупроводници и санкциите.
На топ 100 листата се најдоа шест руски компании, чија вкупна продажба достигна 17,8 милијарди долари.
– Осум кинески компании за производство на оружје имале вкупна продажба на оружје од 109 милијарди долари – се наведува во извештајот.
Две турски фирми, исто така, беа вклучени во листата: Aselsan (2,16 милијарди долари) и Turkish Aerospace (1,2 милијарди долари).
