Меѓународната фудбалска федерација (ФИФА) објави дополнителен контингент билети за финалето на Светското првенство, кое ќе се игра на 19 јули на стадионот „МетЛајф“ во Ист Радерфорд, во американската држава Њу Џерси.
Веста изненади многу фанови, бидејќи официјалната платформа за продажба претходно покажа дека сите билети се распродадени. Сепак, цените на новиот контингент покажуваат дека присуството на финалето ќе биде достапно главно за оние со многу длабок џеб.
Повеќе од 1.100 нови билети по цена од 7.380 долари
ФИФА издаде вкупно 1.178 билети од втората категорија, а цената на секој е 7.380 долари. Станува збор за седишта на горниот прстен на стадионот, по страничните линии на теренот.
ВИП седиштата чинат до 34.500 долари. За навивачите кои сакаат седишта поблиску до теренот или пристап до ексклузивни ложаи, цените се многу повисоки.
ФИФА издаде и 68 билети од прва категорија, чии цени се движат од 19.995 до 32.970 долари, додека луксузните ВИП пакети со храна и пијалоци достигнуваат дури 34.500 долари.
ФИФА не објасни од каде доаѓаат новите карти
Како што пишува ABC News, ФИФА сè уште не одговорила зошто дополнителниот контингент билети се појавил само неколку дена пред финалето, откако официјалниот систем покажа дека натпреварот е распродаден.
Цените се уште повисоки на платформите за препродажба
На официјалната платформа за препродажба на билети на ФИФА, најниските цени почнуваат од околу 7.440 долари, додека некои продавачи бараат мултимилионски суми кои, според сите извештаи, се повеќе симболични отколку реални.
За споредба, билетите за четвртфиналните натпревари на Светското првенство можеа да се купат за помеѓу 1.600 и 3.995 долари, што дополнително покажува колку интересот за големото финале ги зголеми цените.