Колку се полни складиштата на гас во ЕУ? Бројките покажуваат дека зависноста од Русија слабее

33

И покрај обидите на Русија да ги загрози испораките на гас во Европската унија поради војната во Украина, зафатеноста на складиштата за природен гас во ЕУ во декември изнесуваше 84 проценти и е повисока од просечните резерви во периодот од пред четири до шест години беше соопштено синоќа од европските комисии.

– Имаме прилично добра позиција и полни складишта на гас за почетокот на оваа година, но не сметаме дека тоа е причина за самозадоволство. Знаеме дека оваа година ќе продолжи да биде предизвикувачка – изјави портпаролот на ЕК Тим Мекфи, а пренесува АП.

– Колку повеќе инвестираме во енергетска ефикасност, толку помалку енергија трошиме. Колку повеќе ги поттикнуваме обновливите извори на енергија, толку помалку ќе бидеме зависни од гасот, што влијае и на цената на струјата и на глобалното затоплување – додаде тој.

Во страв од недостиг на гас, земјите-членки на ЕУ почнаа да складираат резерви минатата година, а нивото на заеднички резерви на гас се зголеми на 82 отсто до септември минатата година, нешто повеќе од планираните 80 отсто, потсетува извештајот на АП.

Поради поскапувањето на гасот, потрошувачката е намалена за 20 отсто во периодот од август до ноември. Одговарајќи на санкциите на ЕУ поради војната во Украина, Русија минатата година ја заостри политиката за гас кон Европа.

Пред рускиот претседател Владимир Путин да им нареди на руските војници да влезат во Украина на крајот на февруари минатата година, рускиот гас сочинуваше 40 отсто од вкупните количества увезени во Европа, додека денес сочинува едвај девет отсто.