Германската компанија Continental AG укинува околу 7.150 работни места, со цел да ги намали трошоците и да ја зајакне конкурентноста на пазарот кој се повеќе се префрла на електрични возила. Најавените намалувања изнесуваат приближно 3,6 отсто од глобалната работна сила на производителот со седиште во Хановер, објави Блумберг во средата.
Компанијата, исто така, сака да консолидира локации во Германија и други делови од светот, вклучувајќи голем број на функции за истражување и развој.
Ќе бидат укинати околу 1.750 позиции во секторот за истражување и развој, а останатите 5.400 вработени ќе бидат отпуштени од администрацијата, соопшти компанијата. Околу 40 отсто од најавените отпуштања ќе бидат во Германија.
Германската индустрија се соочува со тешка транзиција кон почиста економија. Под притисок да ги намали трошоците додека мораше да инвестира во нови технологии, Continental исто така почна да разгледува можни намалувања, заеднички вложувања и партнерства во автомобилска единица која заостанува зад ривалите.
Кон крајот на минатата година, Continental објави цели за заштеди од околу 400 милиони евра (428 милиони долари) годишно, почнувајќи од оваа година, и посочи дека како резултат на тоа ќе бидат укинати илјадници работни места. Во тоа време, претседателот Волфганг Рајцле рече дека компанијата е „подготвена да направи се“ за да ја поправи својата автомобилска единица.