Нокиа, поранешниот неоспорен владетел на пазарот на мобилни телефони, очигледно ќе престане да произведува паметни телефони по 2026 година. Компанијата HMD Global, која произведува уреди на Нокиа под лиценца од 2017 година, наскоро ќе ги изгуби ексклузивните права, а самиот концерн Нокиа очигледно не планира дополнително да го лиценцира својот бренд за производство на мобилни телефони. Оваа вест, која означува конечен крај за враќањето на култниот бренд, првпат ја објави германскиот технолошки портал „Heise.de“, а ја потврдија и други медиуми, вклучувајќи го и германскиот Bild.
Во текот на 1990-тите и почетокот на 2000-тите, Нокиа беше синоним за мобилни комуникации. Модели како неуништливиот Нокиа 3310 или напредниот деловен уред познат како „Комуникатор“ ја направија финската компанија апсолутен светски лидер. Во својот најславен период, Нокиа држеше повеќе од 40 проценти од глобалниот пазар на мобилни телефони. Сепак, со доаѓањето на iPhone-от на Apple и триумфалниот марш на паметните телефони со оперативниот систем Android, Нокиа брзо го изгуби тлото. Компанијата не успеа да се прилагоди навреме на новата ера на екраните на допир и екосистемот на апликации, што доведе до стрмен пад на продажбата и уделот на пазарот.
Брендот Нокиа првпат исчезна од пазарот веќе во 2014 година. Откако Мајкрософт ја презеде нивната мобилна дивизија, популарните модели беа преименувани во „Мајкрософт Лумија“. Ова, барем привремено, го заврши поглавјето на телефоните на Нокиа. Надежта беше разбудена со враќањето во 2017 година под капата на финската компанија HMD Global, која беше основана од поранешни вработени во Нокиа. Иако презентираа голем број солидни Android уреди кои играа на картата на носталгија и квалитет на изработка, тие не успеаја да направат значаен пробив на презаситениот пазар доминиран од Samsung, Apple и кинеските производители.
Матичната компанија Нокиа, која денес се занимава со мрежна опрема, исто така не ѝ цветаат рози. По разочарувачката прва половина од годината, новиот шеф Џастин Хотард најави очекувана стабилизација на нарачките до крајот на годината. Сепак, компанијата се соочува со големи проблеми поради слабиот долар. Според Хотард, секоја промена на курсот од само еден цент влијае на деловниот резултат со загуба од 10 до 15 милиони евра. Во вториот квартал, оперативната добивка на концернот се намали за дури 81 процент, на само 81 милион евра. Иако приходите малку се зголемија за два процента на 4,55 милијарди евра, сепак останаа под очекувањата на аналитичарите.