Патниците во Европската Унија ќе добијат појасни права за рачен багаж, вклучувајќи го и правото на бесплатен мал личен предмет во кабината, додека авиокомпаниите ќе мора потранспарентно да ги прикажуваат цените на билетите што вклучуваат поголема рачна торба, како дел од најсеопфатната реформа на правата на патниците во авионот во повеќе од две децении.
Според конечниот договор на институциите на ЕУ, секој патник ќе има право да внесе еден личен предмет, како што е мала торба или ранец, во авионот без дополнителен надомест.
Мора да се смести под седиштето пред патникот или да има максимални димензии од 40 x 30 x 15 сантиметри.
За поголем рачен багаж, правилата се различни. Авиокомпаниите нема да бидат обврзани да го вклучат бесплатно во секој билет, но ќе мора да овозможат многу појасна споредба на цените при резервацијата. Цената на билетот што вклучува рачен багаж ќе мора да се прикаже пред да започне процесот на резервација, додека превозниците сè уште ќе можат да понудат поевтина цена на патниците што ќе изберат да патуваат без таква торба.
„Еуроњуз“ наведува дека новите правила би можеле да стапат во сила најрано во октомври 2027 година. Европската комисија прецизира дека новите правила ќе стапат во сила 12 месеци по нивното формално усвојување и објавување во Службениот весник на Европската Унија.
Покрај прашањата за багажот, новите правила ги регулираат и правата на патниците во случаи на доцнење и откажување на летови, постапката за поднесување барања за надомест и помош на патниците со попреченост или намалена подвижност. Семејствата ќе имаат право децата под 14 години да седат до придружно лице без дополнителни трошоци.
Новите правила, исто така, ја забрануваат практиката со која авиокомпанијата може да му одбие повратен лет на патник само затоа што не го искористил појдовниот дел од повратниот билет.