Најавата на „Фолксваген“ дека може да укине околу 100.000 работни места и да затвори некои фабрики отвори нова дебата за состојбата на европската индустрија.
Во уредничкиот коментар на британскиот весник „Гардијан“ се проценува дека оваа криза е предупредување не само за Германија, туку и за целата Европска Унија, која се соочува со растечка конкуренција од Кина, американските тарифи и сопствените економски слабости.
Повикувајќи се на анализата на Центарот за европски реформи, „Гардијан“ наведува дека трговскиот суфицит на Кина во преработувачката индустрија со Европската Унија денес приближно одговара на годишниот бруто домашен производ на Италија и продолжува да расте за околу 30 проценти годишно. Според оваа анализа, Европа, а особено Германија, е загрозена од деиндустријализација доколку не го промени својот сегашен пристап.
Кризата особено ја погоди автомобилската индустрија, која претставува еден од столбовите на германската економија. Директно и индиректно, овој сектор обезбедува околу три милиони работни места во Германија. „Гардијан“ објавува дека европските производители на електрични автомобили се соочуваат со силна конкуренција од кинеските компании, кои се поддржани од државни субвенции. Во исто време, американските царини воведени од американскиот претседател Доналд Трамп доведоа до пад на извозот на германски автомобили во САД, додека кинескиот пазар стана значително помалку достапен за европските производители.
Покрај надворешниот притисок, „Фолксваген“ призна дека се соочува и со високи оперативни трошоци и технолошко заостанување во одредени сегменти од развојот. Слични предизвици се присутни во европската хемиска и воздухопловна индустрија, додека Европската унија сè уште се обидува да договори заедничка стратегија за заштита на клучните производствени сектори.
Европскиот комесар за индустрија, Стефан Сежурне, ги оцени најавените отпуштања во „Фолксваген“ како сериозен сигнал дека е потребно итно да се заштити европскиот пазар од, како што рече, неправедните практики на глобалниот пазар.
Еден од клучните инструменти треба да биде Законот за забрзување на индустријата, кој предвидува милијарди евра субвенции и стимулации за европските производители. Сепак, како што потсетува „Гардијан“, неговото усвојување е одложено и малку е веројатно дека ќе биде завршено пред крајот на годината.
„Гардијан“ проценува дека одредени резерви кон посилна европска индустриска политика доаѓаат токму од Германија, која, поради својата извозна ориентација, се плаши од можни трговски контрамерки. Во исто време, канцеларот Фридрих Мерц презентираше пакет економски мерки што вклучува намалување на административните пречки, промени во одредени трудови прописи и зголемување на возраста за пензионирање.
Според мислењето на уредниците на британскиот весник, ваквите мерки не се доволни за да одговорат на предизвиците со кои се соочува европската индустрија во моментов. Европа мора да реагира. „Гардијан“ заклучува дека Европската Унија повеќе не може да смета на лесен пристап до американскиот пазар, додека слабата домашна побарувачка дополнително ја комплицира положбата на европските производители.
Весникот верува дека ЕУ има инструменти за зајакнување на сопствената индустрија, но дека е потребно итно да се усвојат мерки што ќе овозможат заштита на европските компании од нелојална конкуренција и зачувување на производството. Во заклучокот на уредничкиот коментар, се предупредува дека продолжувањето на намалувањето на работните места и падот на животниот стандард би можеле дополнително да го поттикнат социјалното незадоволство и зајакнувањето на екстремната десница низ цела Европа.
Минатата недела, работниците на „Фолксваген“ протестираа на 18 локации низ Германија поради најавените отпуштања. „Гардијан“ оценува дека нивната борба ги надминува границите на една компанија и претставува предупредување дека Брисел и владите на земјите-членки повеќе не можат да го одложуваат усвојувањето на порешителни индустриски мерки.
