Во април 2026 година, за прв пат по повеќе од три децении, Кувајт не извезе ниту еден барел сурова нафта, поради блокадата на Ормутскиот теснец, според специјализираната страница за следење на испораките на нафта TankerTrackers.com.
Според извештаите, иако Кувајт продолжува да произведува нафта, која делумно се складира, а делумно се преработува во деривати, од кои дел се извезува, немаше извоз на сурова нафта во текот на април, објави Ал Џезира.
Таква ситуација не е забележана од крајот на Заливската војна во 1991 година, а е последица на блокадата на Ормутскиот теснец, клучен пат за транспорт на нафта од регионот.
Поради поморската блокада на Ормутскиот теснец, која го запре транспортот на нафта, државната компанија „Кувајт Петролеум Корпорејшн“ беше принудена да ја продолжи состојбата на виша сила за извоз на нафта на 17 април, објави Блумберг.
Кувајт има максимален производствен капацитет од околу 3,2 милиони барели дневно, додека пред кризата производството беше околу 2,7 милиони барели дневно, а како што пишува CNBC, на почетокот на мај производството беше намалено на околу 1,2 милиони барели дневно.
Нафтата е основа на кувајтската економија, сочинувајќи околу 50 проценти од бруто-домашниот производ, додека приходите од извоз на нафта обезбедуваат приближно 90 проценти од буџетските приходи на земјата, според податоците на Светската банка.