Лагард: Нема да ја заоструваме монетарната политика- тоа би го задушило закрепнувањето

7

Европската централна банка (ЕЦБ) не треба да ја заострува својата монетарна политика прерано – дури и соочена со „непожелна и болна“ инфлација, изјави денеска претседателката на ЕЦБ, Кристин Лагард.

Банката „многу сериозно“ ја сфаќа загриженоста за растот на цените, рече Лагард за време на Европскиот банкарски конгрес во Франкфурт, повторувајќи дека не очекува зголемување на каматните стапки следната година.

„Проценуваме дека повисоката инфлација врши притисок врз реалните приходи на луѓето, особено оние на дното на распределбата на доходот“, рече таа, цитирана од „Блумберг“.

Цените во еврозоната растат со најбрзо темпо од 2008 година. Иако се предвидува дека инфлацијата ќе забави во 2022 година, таа најверојатно ќе се забрза прво поради повисоките трошоци за енергија и проблемите со синџирот на снабдување, фактори кои претставниците на ЕЦБ во голема мера ги доживуваат како привремени.

Растот на цените во Германија достигна 4,6% минатиот месец, што го натера водечкиот таблоид во земјата да експлодира против Лагард затоа што не го скроти.

„Не треба да брзаме со предвремено затегнување кога ќе се соочиме со минливи или создадени од страна на понудата инфлациски шокови“, рече Лагард. „Во време кога куповната моќ е веќе под притисок од повисоките сметки за енергија и гориво, несоодветното затегнување би претставувало неоправдан спротивен ветер за закрепнувањето“, додаде таа.

Лагард истакна дека изгледите за среднорочна инфлација сега се подобри отколку пред пандемијата, кога ЕЦБ се бореше да ја достигне целта од 2 отсто.

„Мораме да продолжиме да ги негуваме овие сили со тоа што нема предвреме да ја повлечеме нашата политичка поддршка“, рече Лагард.