Трошоците за позајмување ќе продолжат да растат во наредните месеци и покрај тоа што официјалните лица преземаат низа чекори што ги претставуваат „најбрзите промени на каматните стапки во историјата“, рече претседателката на Европската централна банка (ЕЦБ), Кристин Лагард.
„Преземавме важни чекори кон нормализирање на нашата монетарна политика, однапред зголемувајќи ги нашите каматни стапки“, изјави Лагард во говорот што го одржа во Франкфурт. Во таа прилика таа додаде дека се очекува ЕЦБ да продолжи да ги зголемува каматните стапки на следните неколку состаноци, пишува Блумберг.
Претставниците на ЕЦБ се во жестока дискусија за следните чекори, откако зедоа знак од Федералните резерви (ФЕД) овој месец и ги зголемија каматните стапки за три четвртини од поен. Иако тие се согласуваат дека се неопходни понатамошни активности за да се спречи рекордната инфлација, постои одредено несогласување за нивото на кое е соодветна агресивната монетарна политика, имајќи предвид дека зголемените трошоци за енергија ја туркаат Европа во рецесија.
Шефот на Банката на Естонија, Мадис Мулер, побара ЕЦБ да реагира „доволно силно и решително“, наведувајќи дека каматните стапки се уште се далеку под нивото што би ја загрозило економската експанзија. Потпретседателот на ЕЦБ Луис де Гуиндос изјави дека забавувањето на економскиот раст само по себе не е доволно за да се запре растот на цените, пренесува Biznis.rs.
Лагард повтори дека ЕЦБ ќе носи одлуки од состанок до состанок и дека секој чекор што ќе го преземе ќе се заснова на економски податоци.
Нагласувајќи дека во Европа растот на инфлацијата не е поттикнат од побарувачката, како што е случајот во Соединетите Американски Држави, Лагард изјави дека засега нема ризик од зголемување на цените поради растот на платите.
