Рускиот нафтен гигант Лукоил денес објави дека прифатил понуда од глобалниот трговец со енергија Гунвор да ги купи сите негови странски средства. Овој потег на втората најголема руска нафтена компанија е директна последица од санкциите што Вашингтон ѝ ги воведе минатата недела, пишува Ројтерс.
Планираната продажба претставува најзначаен чекор преземен досега од руска компанија како одговор на западните санкции воведени поради војната во Украина, која започна со руската инвазија во 2022 година, пренесува Индекс хр.
Во соопштението, Лукоил потврди дека ја прифатил понудата на Гунвор за продажба на Лукоил Интернешнл ГмбХ, која управува со сите странски средства на нафтениот гигант.
„Клучните услови на трансакцијата беа претходно договорени меѓу страните. Од своја страна, (Лукоил) ја прифати понудата, обврзувајќи се да не преговара со други потенцијални купувачи“, рече Лукоил.
Гунвор, чиј мнозински сопственик е шведскиот милијардер Торбјорн Тернквист, исто така потврди дека се во преговори со Лукоил за евентуално преземање.
Гунвор инвестира огромни профити
Американското Министерство за финансии издаде дозвола со која им се дава рок на компаниите до 21 ноември да ги завршат сите трансакции со Лукоил и Роснефт, друга руска енергетска компанија опфатена со новата рунда санкции.
„Доколку е потребно, страните планираат да аплицираат за продолжување на постојната лиценца“, наведува Лукоил. Тие додаваат дека целиот договор зависи од одобрението на Канцеларијата за контрола на странски средства при Министерството за финансии на САД.
Гунвор стана познат во 2000-тите како најголем трговец со руска нафта во светот. Меѓу акционерите во тоа време беше Генадиј Тимченко, близок соработник на Владимир Путин, кој го продаде својот удел откако САД му воведоа санкции по руската анексија на Крим во 2014 година.
Гунвор оствари значителен профит од порастот на цените на нафтата и гасот по почетокот на војната во Украина и европското оддалечување од руските извори на енергија. Овие профити сега ги користат Гунвор и конкурентите како Витол и Трафигура за стекнување средства, од рафинерии и нафтени полиња до електрани и ветерни фарми.
Што продава Лукоил?
Лукоил, со седиште во Москва, е одговорен за околу 2% од глобалното производство на нафта. Нејзин најголем странски имот е ирачкото нафтено поле Западна Курна 2, едно од најголемите во светот, во кое поседува 75% удел, а чие производство надмина 480.000 барели дневно во април.
Компанијата е исто така сопственик на рафинеријата Лукоил Нефтохим Бургас во Бугарија, најголемата на Балканот, и рафинеријата Петротел во Романија. Покрај тоа, Лукоил испорачува нафта во Унгарија, Словачка и турската рафинерија СТАР.
Портфолиото вклучува и акции во нафтени терминали, малопродажни синџири за гориво во Европа и бројни проекти во Централна Азија, Африка и Латинска Америка.