Цените на горивата ширум светот и натаму бележат големи разлики, зависно од локалната економија, даночната политика и пристапот до нафтени ресурси. Додека во некои земји бензинот се точи речиси бесплатно, во други цените достигнуваат рекордни нивоа. Во Македонија, литар ЕУРОСУПЕР БС95 моментално чини 71,50 денари, што ја позиционира земјата во средината на глобалната ценовна листа.
Најевтиното гориво е достапно во земјите богати со нафтени ресурси.
Во април 2025 година, цените на горивата значително варираат низ целиот свет, одразувајќи ги економските, политичките и географските специфики на поединечните земји.
На врвот на листата на земји со најскапо гориво е Хонг Конг, каде што граѓаните плаќаат дури 3,46 евра за литар бензин од 95 октани. Високите цени во овој град делумно се резултат на ограничениот простор, високите даноци и трошоците за увоз на гориво. Следува Исланд со цена од 2,35 евра за литар, каде што цените се под влијание на високиот животен стандард и трошоците за транспорт. Данска е на третото место со 2,21 евра за литар, по што следуваат Холандија со 2,20 евра и Лихтенштајн со 2,14 евра. Во овие европски земји, високите даноци на гориво, вклучувајќи ги и еколошките даноци, значително придонесуваат за високите цени, а во исто време го поттикнуваат користењето на алтернативни извори на енергија.
Од друга страна, најевтиното гориво е достапно во земјите богати со нафтени ресурси, каде што владите често ги субвенционираат цените на горивата за да ги поддржат своите популации. Во Либија, литар бензин чини само 0,027 евра, што е најниската цена во светот. Иран е многу блиску со цена од 0,029 евра за литар, додека во Венецуела литар бензин е 0,035 евра.