Македонскиот премиер Никола Груевски денеска во Лондон ќе учествува на конференција на тема Инвестирање во Западен Балкан, што ја организира Европската банка за обнова и развој (EBRD).
Предвидено е Груевски во своето обраќање да се осврне на соработката со EBRD, можностите и капацитетите за нејзино интензивирање, како и за стратешките инфраструктурни проекти на Владата во сферата на патната инфраструктура, изградбата на Коридорите 8 и 10, инвестициите во енергетиката, железницата и посветеноста кон привлекување инвестиции како механизам за обезбедување економски напредок на државата и перспектива за развој на регионот.
Конференцијата во Лондон ќе ја отвори претседателот на EBRD, Сума Чакрабарти, министерот без ресор во Владата на Обединетото Кралство Кенет Кларк, комесарот за проширување и соседска политика на ЕУ Штефан Филе. Покрај премиерот Груевски најавено е учество на премиерот на Хрватска Зоран Милановиќ, на Албанија Еди Рама, на Србија Ивица Дачиќ, на Црна Гора Мило Ѓукановиќ, на Косово Хашим Тачи, како и претседавачот со Советот на министри на БиХ Вјекослав Беванда.
Меѓу темите за кои ќе се дискутира на конференцијата се диверзификација на енергија во Западен Балкан, улогата на новите извори и патишта за снабдување, инфраструктура во услови на рестриктивен буџет и улогата на приватниот сектор како и можностите за трговска интеграција на регионот.
Се очекува на истата конференција на тема Македонски модел за подобрување на бизнис климата да се обратат вицепремиерот и министер за финансии Зоран Ставрески и директорот на Дирекцијата за ТИРЗ Виктор Мизо.
Според најавата, тие ќе се осврнат на моделот кој се воспоставува за развој на бизнис климата, а ќе ги потенцираат и образложат реформите и механизмите кои Република Македонија ги презема за привлекување инвестиции, поволниот даночен пакет, погодностите за инвестирање во развојните зони кои го сочинуваат македонскиот модел за подобрување на бизнис климата.
