Светот мора да продолжи да вади нафта и гас за да ја одржи цивилизацијата, а истовремено да продолжи да развива одржливи извори на енергија, изјави шефот на американскиот концерн за електрични автомобили Tesla Inc. Елон Маск пред новинарите за време на конференција во Норвешка.
„Реално, мислам дека треба да користиме нафта и гас на краток рок, бидејќи во спротивно цивилизацијата ќе пропадне“, рече Маск, цитиран од Ројтерс.
На прашањето дали Норвешка треба да продолжи да вади нафта и гас, претприемачот рече дека колку што знае земјата во моментов истражува неколку нови полиња.
„Еден од најголемите предизвици со кои се соочува светот е транзицијата кон одржлива енергија и кон одржлива економија… за што ќе бидат потребни неколку децении за да се заврши“, истакна најбогатиот човек на планетата.
Неговата Tesla, како и другите производители на автомобили, се соочи со проблеми со забрзување на инфлацијата во последните месеци. Во неколку наврати, компанијата беше принудена да ги зголеми цените на своите електрични автомобили поради зголемените трошоци за компонентите и зголемените трошоци за логистика.
На почетокот на август, Маск за време на годишниот состанок на Tesla со акционерите рече дека видел знаци дека глобалната економија го поминала „врвот на инфлацијата“. Додал дека трошоците на компанијата за суровини и компоненти се намалуваат во следните шест месеци. Ги повтори претходните коментари дека очекува да дојде до блага рецесија која би можела да трае 18 месеци.
„Трендот е надолен, што сугерира дека го надминавме врвот на инфлацијата“, рече Маск претходно во седиштето и фабриката на Tesla во Остин. „Мислам дека инфлацијата брзо ќе се забави“ во одреден момент во иднината, додаде тој.
