Гасната криза не е завршена, предупреди Меѓународната агенција за енергетика (ИЕА), која повика на 15 февруари редок специјален состанок со министрите на околу 40 земји за да се разгледа „состојбата на пазарот на гас“.
Тоа е прв ваков специјален состанок за гасот што го свика ИЕА во својата понова историја, соопшти прес-службата на агенцијата Франс прес. Пазарите на гас ги претрпеа најголемите нарушувања од руската инвазија на Украина пред речиси една година, со историски врвови на цените и невиден притисок врз глобалните енергетски пазари.
Русија ги преполови испораките на гас за Европската унија во 2022 година, а гасоводите практично се затворени во 2023 година.
Заштеди на Европејците и кризата
Европејците ја намалија потрошувачката на гас оваа зима, но следната зима ќе зависи од испораките на течен природен гас од САД и Блискиот Исток, за кои Европа се натпреварува со Азија.
Иако цените на гасот паднаа од рекордните нивоа во 2022 година и нивото на складирање се зголеми во ЕУ, „кризата не е завршена“, рече извршниот директор на агенцијата, Фатих Бирол, во изјавата.
„Останува уште многу да се направи, особено за да бидеме подготвени за следната зима“, додаде тој.
Тој рече дека сè уште има потреба членовите на Агенцијата и другите партнери да се солидаризираат и да преземат конкретни мерки за обезбедување на безбедноста на снабдувањето.
Фото Pexels
