Министрите за енергетика на 27-те земји-членки на Европската унија денеска се среќаваат во Брисел за да одобрат вонредна давачка за дополнителниот профит на енергетските компании и да започнат дискусии за нивниот следен потег, веројатно за ограничување на цената на гасот, со цел да се реши енергетската криза во Европа.
Министрите ќе разговараат за мерките предложени од Европската комисија минатата недела во обид да се спречи скокот на цените на енергијата што поттикнува рекордно висока инфлација и се заканува со рецесија, пишува Ројтерс.
Предложените мерки вклучуваат данок на вишокот профит на компаниите за фосилни горива остварени во 2022 или 2023 година, потоа данок на вишокот приход што евтините производители на електрична енергија го остваруваат од зголемувањето на цените на електричната енергија и задолжително намалување на потрошувачката на електрична енергија од 5,0 отсто во текот на период на високи цени.
Дипломати од повеќе земји се уверени дека министрите денеска ќе го одобрат овој пакет.
Тие потоа ќе се фокусираат на следните чекори на ЕУ за намалување на цените на енергијата, при што многу земји се залагаат за целосно ограничување на цените на бензинот, додека други, особено Германија, остануваат против.
Консензусот за воведување на ограничувањето на цената на гасот воопшто не е близок, изјави дипломат од земја од ЕУ.
Петнаесет земји на ЕУ, вклучувајќи ги Франција, Италија и Полска, побараа од Брисел оваа недела да предложи плафон за цената на гасот за сите трансакции на големо за да се спречи инфлацијата.
ЕУ треба да ја ограничи цената на гасот на ниво кое е доволно високо и флексибилно за да и овозможи на Европа да ги привлече потребните ресурси, се вели во меморандум во кој го објаснуваат својот предлог Белгија, Грција, Полска и Италија, што синоќа го виде Ројтерс.
Противниците на предлогот, вклучително и Германија и Холандија, велат дека ограничувањето на цените на гасот може да им отежне на земјите да привлечат добавувачи бидејќи тие нема да можат да им понудат на продавачите на гас на светските пазари оваа зима конкурентна цена во однос на другите купувачи.
