Извршниот директор на германскиот телекомуникациски гигант Deutsche Telekom, Рене Оберман неочекувано најави повлекување од функцијата кон крајот на следната година.
Надзорниот одбор на DT ја прифати вчера неговата оставка и од 1 јануари 2014 година ќе го замени досегашниот финансиски директор на компанијата, Тимотеус Хотгес. Мандатот на Оберман требаше да истече на крајот на октомври 2016 година. Причина за неговото заминување не е наведена.
Се претпоставува дека одлуката да се повлече е лично негова. Оберман во DT е 16 години, седум години е извршен директор, а претходно ја водеше најпрофитабилната дивизија, T-Mobile.
“Наша цел мора да биде успешно спроведување на трансформациските стратегии коишто заедно ги креиравме. Очекуваме дека до 2014 година ќе го запреме падот на приходи и ќе почнеме повторно да бележиме раст”, изјави Хотгес преку соопштение. Тој повтори дека DT ќе инвестира големи суми во прв ред во мрежите во Германија и САД.
DT за следните три години најави вкупни инвестиции од скоро 30 милијарди евра, од кои 9,8 се наменети за следната година.
