Морган Стенли планира да укине уште 3.000 работни места до крајот на јуни, бидејќи банката на Волстрит се обидува да го преживее долготрајниот пад на зделките.
Луѓето запознаени со процесот велат дека високите менаџери имаат за цел да елиминираат околу 5 отсто од работните места, со исклучок на финансиските советници кои работат со клиенти во клучниот оддел за управување со богатството, кои ќе бидат поштедени.
Намалувањето на работната сила ќе се прошири низ останатиот дел од банката со седиште во Њујорк, која вработува вкупно 82.000 луѓе. Се очекува дека секторот инвестициско банкарство и хартии од вредност ќе бидат повеќе погодени од другите делови на банката.
Банките веќе го започнаа најостриот круг на кратења на работни места од финансиската криза во 2008 година, а многу од адвокатските канцеларии, консултанти и сметководствени групи кои работат со нив, исто така, отпуштаат работници.
Работата на првичните јавни понуди и спојувања и превземања пресуши бидејќи глобалното склучување зделки го претрпе најслабиот почеток на една година во последната деценија, објави Financial Times. Затоа институциите кои побрзаа да ангажираат персонал за да се справат со растечките активности за време на пандемијата на коронавирус оставаат зад себе повеќе луѓе отколку што им треба.
За Морган Стенли ова ќе биде втор круг намалувања за помалку од шест месеци. Во декември елиминираше 1.800 вработени или нешто повеќе од 2 отсто од вкупната работна сила. Банката тогаш објави дека не се очекуваат дополнителни намалувања.
Морган Стенли одби да коментира. Веста за отпуштањата првпат ја објави Блумберг.
Главниот извршен директор Џејмс Горман минатиот месец предупреди дека активноста на инвестициското банкарство „останува многу пригушена“ и предвиде дека приходите можеби нема да закрепнат до 2024 година. Добивката на банката во првиот квартал падна веќе петта година во однос на претходната година. Горман ги намали платите за 10 отсто за 2022 година, како одраз на послабите перформанси на компанијата во споредба со 2021 година.
Фото: Facebook
