Приходите од труд во време на пандемијата во првите девет месеци од оваа година се намалени за 10,7 % на светско ниво или 3.500 милијарди долари, се вели во најновиот извештај на Меѓународната организација на трудот (МОТ).
Затворањето на бизнисите продолжува да ја нарушува состојбата на светските пазари на труд, што резултира со поголема загуба на работното време, отколку што првично се проценуваше, стои во шестото издание на извештајот на МОТ за ефектите од пандемијата врз трудот.
Работниците во економиите во развој, особено оние кои се вработени на црно, се погодени многу потешко отколку во претходните кризи. Тие додаваат дека бројот на вработени жени бележи поголем пад одошто кај мажите.
Само во вториот квартал се загубени 17,3 % од работните часови, што е еквивалентно на 495 милиони работни места со полно работно време, пресметале во МОТ. Во претходниот извештај, тие проценуваа дека се изгубени 14% од работните часови или 400 милиони работни места.
Тие очекуваат 12,1 % загубени работни часови во третиот квартал, што е еквивалентно на 345 милиони работни места.
Фото: Pixabay
