Веќе објавените планови на земјите-членки на ЕУ за проширување на нуклеарната енергија ќе бараат огромни инвестиции од 241 милијарда евра и нови финансиски инструменти што треба да помогнат овие огромни трошоци да бидат помалку ризични за приватните инвеститори, објави Европската комисија во петок.
Голем број земји од Европската Унија ги презентираа своите планови за проширување на капацитетот за производство на нуклеарна енергија, од сегашните 98 гигавати (GW) на 109 гигавати до 2050 година, соопшти Комисијата во нацрт-документ во кој се анализираат потребните инвестиции во секторот, кој го виде Ројтерс и треба да биде објавен во петок.
Овие планови вклучуваат инвестиции од 205 милијарди евра во изградба на нови нуклеарни централи, плус 36 милијарди евра за продолжување на животниот век на постојните реактори, кои треба да се финансираат и од јавни средства и од приватни инвестиции, според нацрт-документот.
Околу 24 проценти од вкупното производство на електрична енергија во ЕУ беше произведено минатата година од нуклеарна енергија. Бидејќи неодамна започнатите нуклеарни проекти во Европа често ги надминуваат проектираните трошоци и се соочуваат со големи одложувања и доцнења, Комисијата вели дека се потребни дополнителни финансиски инструменти за привлекување на приватни инвеститори кои во моментов се одбиваат од високи инвестициски ризици и високи почетни трошоци.
Доколку планираните нови проекти се одложат само за пет години, тоа би довело до дополнителни трошоци од 45 милијарди евра до 2050 година, според извештајот на Комисијата. „Добар одговор на тоа би можел да биде комбинација од различни извори на финансирање, дополнети со некои инструменти за намалување на ризикот“, рече Комисијата.
Долго време, различните влади на земјите-членки на ЕУ не можеа да се согласат околу прашањето дали нуклеарната енергија треба да се промовира како еден од начините за намалување на емисиите на CO2 и постигнување на целите на европската зелена транзиција. Во центарот на овие спорови се Франција – која се потпира на нуклеарните централи како главен извор на електрична енергија – и Германија, чии претходни влади отсекогаш биле против проширувањето на нуклеарните централи.
Поради оваа причина, енергетските мерки на Европската Унија обично не ја издвојуваат нуклеарната енергија како дел од европските стимулации или цели, а изградбата на нови нуклеарни централи не се финансира од буџетот на ЕУ. Во нацрт-документот се наведува дека Комисијата и Европската инвестициска банка (ЕИБ) ќе започнат пилот-програма за купување електрична енергија во вредност од 500 милиони евра, за која ќе можат да аплицираат и нуклеарни проекти.
Фото Pixabay
