Откако централните банки почнаа да ги зголемуваат клучните каматни стапки во борбата против високата инфлација, последиците од тоа почнаа да се чувствуваат и во најголемите светски економии.
Според Sky News, Обединетото Кралство падна во рецесија во последниот квартал од минатата година.
Според британските медиуми, рецесијата треба да биде блага и краткотрајна и да не влијае премногу врз потрошувачите.
Но, вестите се лоши за британскиот премиер Риши Сунак, кој го направи растот на шестата по големина светска економија главна цел на неговата влада и на Конзервативната партија, пренесува Банкар.ме.
Тоа е, инаку, техничка рецесија, која се дефинира со втор последователен пад на тримесечен бруто-домашен производ (БДП). Економијата на Велика Британија се намали за 0,3 отсто меѓу октомври и декември минатата година во споредба со истиот период во 2022 година, покажуваат најновите официјални статистички податоци.
Падот на БДП беше поголем отколку што очекуваа аналитичарите – се предвидуваше намалување од 0,1 отсто.
Изненадување во Азија
Јапонија, исто така, неочекувано влезе во рецесија. Според CNN, тамошната економија се намалила поради скромните домашни трошоци.
БДП падна за 0,4 отсто во последниот квартал во споредба со минатата година, објави во вторникот јапонската влада.
Личната потрошувачка, која сочинува половина од јапонската економија, е намалена за 0,2 отсто. Јапонците се соочуваат со високи цени за храна, енергија и други потреби.
Земјата на изгрејсонцето задоволува дури 94 отсто од основните енергетски потреби преку увоз, а во исто време увезува 63 отсто од храната. Кога тоа ќе се земе предвид, сегашната ниска вредност на јенот значително придонесува за повисоките трошоци за живот, истакнува Нил Њуман од деловното издание Japanmacro.
Германија ја престигна Јапонија и покрај падот
Вестите за рецесијата покренуваат прашања за здравјето на глобалната економија. Јапонија и Велика Британија се четврти и шести најголеми економии во светот. Јапонија досега беше на третото место, но беше претекната од Германија.
Клучниот фактор кој влијаеше на промената на рангирањето беше послабиот јапонски јен, бидејќи номиналниот БДП се пресметува во долари.
Според најновите податоци (за 2023 година), најголема светска економија се Соединетите Американски Држави, кои минатата година забележаа раст на БДП од 3,1% според американското Министерство за трговија (ова е раст на БДП од последниот квартал на 2022 година до последниот квартал минатата година). Втора по големина е Кина, која минатата година имаше реален раст на БДП од 5,2%. Третата по големина, германската економија падна, сепак, за 0,3 отсто во 2023 година.