Од четврток, (19.12.2013 година) стапуваат во сила новите референтни цени на лековите на позитивната листа. На 170 лекови им се намалува доплатата, од нив на 110 им се намалува и партиципацијата, а 21 лек (15 нови терапии) првпат на осигурениците ќе им бидат достапни без доплата (и тоа за дигестивни пореметувања, кардиоваскуларни, ревматски и заболувања на тороидната жлезда, аналгетици, антибиотици итн.).
Ова денеска на прес-конференција го истакна директорката на ФЗОМ, Маја Парнарџиева Змејкова, која посочи дека ова е четврта по ред ревизија на цените од страна на Фондот за здравствено осигурување на Македонија, што ќе значи заштеда годишно на Фондот од 88 милиони денари, а за пациентите од 31 милион денари или вкупно 119 милиони денари заштеда на целиот здравствен систем.
Сакаме, нагласи Парнаџиева – Змејкова, во следните две години да овозможиме 100% од генериките да имаат по еден лек без доплата.
“Засега тој број беше 73% или 284 генерики, а од 19 декември дополнителни 15 терапии ќе бидат со лекови без доплата или вкупно 299 генерики стануваат без доплата за осигурениците. Тоа се рекордни 76,5% од генериките без доплата и со ова најавуваме дека нашиот стратешки план за две години најверојатно ќе го реализираме”, посочи Парнарџиева Змејкова.
Појасни дека само уште 23,5% од лековите имаат доплата.
“Рекордни 442 лека стануваат без доплата, а доплатите до 50 денари се зголемуваат. Првпат имаме 85% од сите заштитени имиња да бидат или без доплата или со доплата од нула до 100 денари”, рече Парнарџиева Змејкова и додаде дека фармацевтите и матичните лекари треба да ги информираат пациентите кои лекови се без доплата.
