Не разбирам!

22

prasalnici

Фото: Pixabay

Се случува, неретко, некои работи да не ги разбереме кај другите. Се случува, неретко, некои работи другите да не ги разберат кај нас. И токму поради тоа неразбирање, настануваат проблеми или недоразбирања.

И сè би било убаво и би било мазно, ако се разбираме или барем кога не се разбираме, да си кажеме дека не разбираме. Но не си кажуваме затоа што сме стегнати од многу работи околу нас и многу поставености на кои можеме или не можеме да влијаеме. Но јас велам, без оглед на сите тие влијанија околу нас, треба да си кажеме, доколку нешто или некого не разбирате.

Еве ви неколку совети кои ми помогнале мене да се разберам со луѓето или да разберам нешто:

– Прекинување – ако некого не разбирате што ви зборува, слободно прекинете го. Јас на предавања, ако нешто не ми е јасно, секогаш поставувам прашања. Не за друго, ако оставам да си тече дискусијата, а јас нешто не сум разбрал, тогаш од самиот почеток јас можеби погрешно ќе разберам и целата дискусија ќе има друг тек.

– Појаснување – ако сте во хиерархиски проблем, тогаш на крај на презентацијата или дискусијата (ако ви е незгодно да прекинете) побарајте да ви се појасни. Јас едно време мислев дека доколку побарам да ми појаснат за нешто што не ми е јасно, ќе испаднам дека ништо не разбирам, но тоа е сосема погрешно. Подобро да се објасниме па макар било тоа на крај отколку да донесете погрешен заклучок за тоа што сте го слушнале.

– Пробајте да бидете како нив – сакам да кажам да пробате да ја гледате работата од нивна гледна точка. Ако сакам да разберам некого или некоја работа, секогаш пробувам да се ставам во кожата на другите за да може да ги сфатам, а и да разберам што ми зборуваат.

– Иста бранова должина – гледајте со луѓето со кои сте во секојдневна комуникација исто да размислувате, тоа ќе ви помогне многу побрзо да се разберете. Немојте да се вознемирувате, ако има луѓе околу вас со кои не можете да се најдете на исто размислување, тоа е сосема нормално!

– Комуникација – мора да разберете дека сите ние имаме различни начини на комуникација. Тоа многу влијае дали ќе се разбереме или не. Или вие ќе се прилагодите на нивниот начин на комуникација или тие ќе се прилагодат на вашиот. Јас комуникацијата ја прилагодувам на ситуацијата и во зависност од соговорникот/ците.

– Внимателни – бидете внимателни во текот на комуникацијата и слушајте што се зборува. Не донесувајте пребрзо заклучоци во својата глава, затоа што тоа може да доведе до различно разбирање на работите.

Ако можете да видите, има многу начини како да се разбереме, но најважниот е да си кажеме кога не разбираме! Тоа е најважно. Ако не си кажете, тогаш нема да знаеме дека не разбираме, едноставно е. Немојте да се срамите да си кажете.

Со успех во промените.