Нетфликс ги зголемува цените за индивидуалните корисници во Соединетите држави, Велика Британија и Франција, откако го објави својот најдобар квартален раст на претплатници во последните години.
Најголемиот светски провајдер на стриминг содржини соопшти дека додаде 8,76 милиони нови корисници во третиот квартал, што е далеку над прогнозите на аналитичарите. Вкупната база на претплатници се зголеми на 247,2 милиони. Како причини за силниот раст, компанијата ги наведе добрата понуда на нови програми и политиката на потиснување на споделувањето лозинки, пишува Bloomberg.
Инвеститорите беа загрижени дека Netflix може да изгуби клиенти ако ги принуди да не споделуваат сметки со роднините, но всушност забележа зголемување на нови корисници без зголемување на откажувањата. Нетфликс сега е на пат да додаде повеќе од 20 милиони корисници оваа година, што е голем скок од помалку од девет милиони корисници во 2022 година.
Акциите на Нетфликс се зголемија за цели 13 отсто до 392 долари во продолженото тргување по објавувањето на резултатите. Тие се зголемија за повеќе од 17 отсто оваа година до крајот на редовното тргување во средата, надминувајќи ја просечната добивка од 12 отсто за акциите во индексот S&P 500.
Успешното ширење на таканареченото платено споделување, кое им овозможува на корисниците да купат дополнителен пристап за пријателите или членовите на семејството, го охрабри Нетфликс да ги зголеми цените на некои од неговите најголеми пазари.
Почнувајќи од среда, компанијата ја зголемува цената на својот најскап план во САД за 3 до 23 долари и основниот план за 2 до 12 долари, додека другите два планови остануваат исти. Ќе преземе слични чекори во Велика Британија и Франција, два други големи пазари.
Европа, Блискиот Исток и Африка имаат најголем удел во растот на Netflix во третиот квартал. Компанијата додаде речиси четири милиони клиенти во тој регион. Просечната сума што Netflix ја заработува по клиент не се промени многу во текот на изминатата година.