Јапонскиот производител на автомобили Nissan Motor објави дека неговата добивка во периодот од април до декември 2023 година е речиси тројно зголемена во однос на истиот период во 2022 година и изнесува 325,35 милијарди јени или околу 2,04 милијарди евра.
Оперативниот профит порасна за 65,1 отсто на годишно ниво на 478,38 милијарди јени, а продажбата скокна за 22,3 отсто на рекордни 9,17 трилиони јени, според агенцијата Kyodo, пренесува Танјуг.
Во споменатиот деветмесечен период од 2023 година, Nissan продаде 2,44 милиони возила ширум светот, што претставува раст од 1,2 отсто на годишно ниво.
Раст на продажбата е забележан и на јапонскиот пазар и во Европа и Северна Америка.
И покрај добрите резултати, Nissan регистрира проблеми на најголемиот светски пазар на автомобили во Кина, каде што продажбата падна за 34,7 отсто на годишно ниво.