Јапонскиот производител на автомобили Nissan Motor ќе инвестира уште десет милијарди јуани (1,3 милијарди евра) во Кина за да го смени трендот на слаба продажба и да ја достигне тешката конкуренција, изјави директорот на компанијата за Кина, Стивен Ма.
“Може да се каже дека бевме малку бавни во пристапот на пазарот, во споредба со многу брзото темпо во Кина. Кинеските брендови беа, искрено, пребрзи, екстремно брзи и ги фатија сите непредвидени. Мислам дека во меѓувреме се ресетиравме”, рече Ма на саемот за автомобили во Шангај.
Нисан продаде помалку од 700.000 возила во Кина во 2024 година, што значи дека неговата продажба е повеќе од преполовена во споредба со 2020 година. Компанијата ја намали прогнозата за продажба на меѓународните пазари во фискалната година што заврши во март, делумно поради проблемите во Кина, нејзиниот втор најголем пазар.
Тие сега одлучија, според директорот, да инвестираат уште десет милијарди јуани (1,3 милијарди евра) во Кина до крајот на 2026 година.
До летото 2027 година, Nissan ќе претстави десет модели на возила со погон на нови извори на енергија во Кина, пренесува Hina. Претходните планови предвидуваа осум нови модели до крајот на 2026 година.
Планот на Nissan е да продолжи со извоз на возила од Кина во „многу други земји, освен можеби една“, рече Ма, мислејќи на САД, кои де факто го запреа увозот на електрични автомобили од Кина за време на поранешниот претседател Џо Бајден со воведување царини од 100 отсто.
Претседателот Доналд Трамп, исто така, воведе нови царини за увоз на автомобили од 25 отсто, со дополнителни „реципрочни“ царини од 145 отсто за увоз од Кина.
„Долго живеев и работев во САД, но не можев да предвидам дека работите ќе одат во таа насока. Ќе извезуваме во многу земји, но кои сè уште не можеме да објавиме“, рече Ма.