На рангирањето на Форбс за најбогати луѓе во светот за месец јули, Илон Маск го задржа првото место, додека најголемиот светски филантроп Ворен Бафет падна на 10-то место по уште една голема донација.
Легендарниот инвеститор Ворен Бафет на крајот на јуни објави дека донирал акции од Беркшир Хатавеј во вредност од околу 5,3 милијарди долари. Таа донација, како и малиот пад на вредноста на неговите акции, беше доволна да го сруши за дури три места на листата на најбогати, па на почетокот на јули да се најде на десеттото место. Ова е најниската позиција за најдарежливиот човек во светот во последните неколку години.
Тој е еден од само двајцата на топ 10 листата што изгубиле позиција овој месец. Францускиот магнат за луксузни производи Бернар Арно – кој беше најбогатиот човек на светот од февруари до крајот на мај – падна на третото место бидејќи вредноста на акциите на неговата групација LVMH падна втор месец по ред.
Во исто време, Елон Маск го задржа тронот, благодарение на многу добриот јуни. Акционерите на автомобилската компанија „Тесла“ гласаа за Маск да задржи опции за акции од речиси 50 милијарди долари. Иако Форбс ќе продолжи да ги намалува тие опции од пакетот за плаќање за 50 отсто додека Маск всушност не ги добие – процесот на жалба се очекува да трае подолго – неговото богатство сепак се зголеми за 11,1 милијарди долари од 1 јуни, а во последните два месеци до речиси 19 милијарди долари. Многу е веројатно дека наскоро Маск ќе стане уште побогат: SpaceX наводно планира да започне со продажба на акции во понуда која ја вреднува компанијата на 210 милијарди долари – повеќе од минатиот декември кога вредноста на компанијата беше проценета на 180 милијарди долари. Маск поседува околу 42 отсто од акциите.
Џеф Безос, чие богатство се зголеми за 15,5 милијарди долари овој месец, се искачи на второто место откако пазарната вредност на Амазон за прв пат надмина 2 трилиони долари на крајот на јуни, пишува Форбс.
Најдобар јуни, сепак, беше Лари Елисон, чие богатство се зголеми за 26,8 милијарди долари на околу 173 милијарди долари, благодарение на рекордните цени на акциите на Oracle.
Заедно, десетте најбогати луѓе вредат вкупно 1,66 трилиони долари, што е околу 76 милијарди долари повеќе отколку пред еден месец.
