ОАЕ: Криптовалутите ќе играат значајна улога во нашата надворешна трговија

47

Министерот за надворешна трговија на Обединетите Арапски Емирати (ОАЕ), Тани Ал-Зејуди, истакна дека бидејќи земјата привлече многу таленти од крипто секторот, ОАЕ сега мора да воведат правилни регулативи за поддршка на понатамошниот раст.

Криптото ќе игра „главна улога“ во унапредувањето на глобалната трговија на ОАЕ, вели Ал-Зејуди.

Говорејќи за Блумберг во Давос – каде што светот се собра на Светскиот економски форум во 2023 година – Ал-Зејуди даде многу информации за трговските партнерства и политики на ОАЕ.

Коментирајќи за крипто секторот, министерот изјави дека „криптото ќе игра голема улога за трговијата во ОАЕ да се движи напред“, додавајќи дека „најважно е да се обезбеди глобално владеење кога станува збор за криптовалутите и крипто компаниите“.

Ал-Зејуди понатаму сугерираше дека додека ОАЕ работат на својот крипто-регулаторен режим, фокусот е заливската земја да биде центар со крипто-пријателски политики кои исто така нудат доволно заштита.

„Почнавме да привлекуваме дел од компаниите со цел заедно да изградиме соодветен менаџмент и правен систем кој е потребен за тоа“, додаде тој.

Коментарите на Ал-Зејуди доаѓаат само една недела откако кабинетот на ОАЕ воведе нови регулативи кои суштински осигуруваат дека ентитетите кои се занимаваат со крипто активности мора да добијат лиценца и одобрение од Регулаторната управа за виртуелни средства во земјата (VARA).