Објавена листата на најбогати за 2022: Помалку милијардери од лани, неочекувани промени на врвот

25

Магазинот Форбс го објави 36-тото годишно рангирање на најбогатите луѓе на планетата. Овој пат на списокот се 2.668 – што е за 87 помалку од пред една година. Тие вредат вкупно 12,7 трилиони долари – исто така 400 милијарди помалку отколку во 2021 година.

Најдраматичен пад се случи во Русија, каде има 34 милијардери помалку од минатата година, но и во Кина каде има 87 кинески милијардери помалку на листата.

Сепак, Форбс откри повеќе од 1.000 милијардери кои се побогати отколку пред една година. И има 236 лица кои станаа милијардери минатата година – вклучително и милијардери за прв пат од Барбадос, Бугарија, Естонија и Уругвај.

Америка, пак, и понатаму е светски лидер со 735 милијардери вредни 4,7 трилиони долари. Кина (вклучувајќи ги Макао и Хонг Конг) останува на второто место, со 607 милијардери вредни 2,3 трилиони долари.

Извршниот директор на Tesla и SpaceX, Илон Маск, го престигна Џеф Безос и стана најбогатиот човек на светот. Маск за прв пат е на врвот на листата на светски милијардери. Од 11 март, бизнисменот имаше проценета вредност од 219 милијарди долари, откако неговото богатство порасна за 68 милијарди долари минатата година во услови на скок од 33% на цената на акцијата на Тесла.

Нетото богатство на Маск е за 48 милијарди долари повеќе од богатството на Џеф Безос, кој падна на второто место за прв пат по четири години поради падот на акциите на неговиот малопродажен гигант Амазон за 3%. Покрај тоа, милијардерот наводно ги зголемил своите донации во добротворни цели, со што се избришани 6 милијарди долари од неговата нето вредност, која сега изнесува 171 милијарда долари.

Францускиот тајкун Бернар Арно го зазеде третото место на рангирањето, со проценето богатство од 158 милијарди долари. Шефот на LVMH додал 8 милијарди долари на своето богатство минатата година.

Бил Гејтс е на четвртото место со 118 милијарди, а Ворен Бафет е на петтото место на листата на милијардери на Форбс.