Откако ја заврши својата брилијантна тениска кариера, еден од најдобрите спортисти на сите времиња, Рафаел Надал, сè повеќе се посветува на бизнис проекти.
Славниот Шпанец веќе има зад себе низа успешни потфати, од отворање на сопствена тениска академија, која се смета за една од водечките во светот, до лансирање на сопствен бренд за облека.
Сега тој одлучи да го направи својот најголем бизнис чекор досега, влегувајќи во хотелската индустрија со инвестиција вредна над 200 милиони долари.
Според аргентинскиот министер за туризам, Даниел Скиоли, Надал планира да изгради седум луксузни хотели под брендот „Манакор“ на атрактивни туристички локации низ цела Аргентина. Меѓу избраните дестинации се Барилоче, Ел Калафате, Игуасу, Мендоза, Посадас, Салта и Ушуаја.
Првиот хотел треба да биде завршен во Ел Калафате, а според сегашните планови, ќе ги отвори своите врати за гости до 2026 година.