Организацијата за економска соработка и развој (ОЕЦД) одобри ослободување за американските компании од глобалниот минимален корпоративен данок од 15 проценти, според извештај објавен денес од организацијата.
Спогодбата предвидува дека другите држави нема да можат да наметнуваат дополнителни даноци на странските подружници на американските компании за да ја надоместат разликата во оданочувањето, дури и во случаи кога профитот се оданочува под пропишаниот минимум во друга јурисдикција.
Американскиот претседател Доналд Трамп минатата година ги повлече САД од рамката на ОЕЦД за спроведување на глобалниот минимален данок, која беше договорена за време на мандатот на претходната американска администрација, објавува Блумберг.
Ова отвори простор за преговори за посебниот третман на американските компании во меѓународниот даночен систем.
Министерот за финансии на САД, Скот Бесант, во јуни ја обезбеди поддршката од земјите од Групата седум (Г7) за ослободување на американските компании, со договор за конгресните републиканци да го отстранат таканаречениот „одмазднички данок“ од законот за данок од 2025 година, што предизвика загриженост на финансиските пазари.
Американските власти истакнуваат дека нивните компании веќе подлежат на минимално оданочување, вклучувајќи федерален минимален данок од 15 проценти за компании со профит што надминува 1 милијарда долари, како и посебен систем на оданочување на профитот остварен во странство, со стапки помеѓу 12,6 и 14 проценти.
Глобалниот минимален данок беше дизајниран да спречи префрлање на профитот во земји со ниски даноци и требаше да ги опфати мултинационалните компании со приходи што надминуваат 750 милиони евра, пренесува Танјуг.