Надминувањето на ограничувањето од 1,5 степени Целзиусови за глобално затоплување, дури и ако е привремено, може да предизвика трајни и широко распространети последици за глечерите, поларните ледени капи и другите замрзнати делови од планетата, предупредија научниците денес во извештај поддржан од Обединетите нации.
Во извештајот, кој го подготвија 80 научници собрани околу Меѓународната иницијатива за криосфера за клима (ICCI) и Програмата на ОН за животна средина (UNEP), се наведува дека глобалното затоплување, по неизбежен период на надминување на целните температури, треба повторно да се намали под еден степен Целзиус, а идеално на 0,8 степени до 2150 година, објавува Гардијан.
Научниците предупредуваат дека, според сегашните климатски политики, кои водат до затоплување од околу 2,8 до три степени, речиси целиот пермафрост во близина на површината би можел да се стопи, додека може да има и сериозни нарушувања во океанските струи и зголемување на киселоста на океанот.