OpenAI склучи договор што им овозможува на вработените да ги продаваат акциите на компанијата по проценета вредност од 500 милијарди долари, со што сопственикот на ChatGPT го престигна SpaceX на Илон Маск и стана најголемиот стартап во светот.
Сегашните и поранешните вработени во OpenAI продадоа акции во вредност од околу 6,6 милијарди долари на инвеститори, вклучувајќи ги Thrive Capital, SoftBank Group Corp., Dragoneer Investment Group, MGX од Абу Даби и T. Rowe Price, изјави за Ројтерс извор запознаен со трансакцијата.
Тоа ја зголеми вредноста на американската компанија далеку над претходното ниво од 300 милијарди долари за време на инвестициската рунда на SoftBank претходно оваа година.
Тој брз пораст го нагласува инвестицискиот хит околу технолошките лидери со потенцијал да ги трансформираат индустриите и економиите.
OpenAI на Сем Алтман е една од неколкуте компании, вклучувајќи ја и Nvidia Corp., кои сега предводат глобален бран на градење центри за податоци и развој на услуги за вештачка интелигенција – потфат за кој се очекува да чини трилиони долари. Иако сè уште не остварила профит, американскиот стартап помага да се поттикне тој инфраструктурен бум со склучување мега-договори со компании како Oracle и SK Hynix.
Договорот го подигна OpenAI над проценката на SpaceX од 400 милијарди долари. Пресвртот доаѓа во клучен момент за компанијата на Алтман, која е во преговори со Microsoft за трансформација во по традиционална форма со профит.
OpenAI е основана во 2015 година како непрофитна организација посветена на унапредување на дигиталната интелигенција „на начини што најмногу ќе му користат на човештвото како целина“.
И Алтман и Маск, кој е ко-основач на OpenAI, зборуваа за потенцијалниот егзистенцијален ризик што вештачката интелигенција може да го претставува за луѓето. Сепак, подоцна се разделија: Маск поднесе тужба за да се обиде да ја спречи реформата, обвинувајќи ја OpenAI дека не ги исполнува ветувањата што ги даде кога помогна во нејзиното основање. Тој тврдеше дека ја напуштил својата основна цел кога прифатил милијарди долари поддршка од Microsoft во 2019 година, една година откако се повлече од одборот на OpenAI.