Компанијата OpenAI, позната по развојот на вештачка интелигенција, е во завршна фаза на развој на нов интернет прелистувач базиран на вештачка интелигенција, што би можело да претставува предизвик за доминантниот на пазарот Google Chrome, изјавија за Ројтерс луѓе запознаени со плановите на компанијата.
Според тие извори, прелистувачот би можел да биде лансиран во наредните недели, а неговата цел е фундаментално да го промени начинот на кој корисниците пребаруваат на интернет со помош на вештачка интелигенција.
Доколку овој производ биде прифатен од 500-те милиони активни корисници на ChatGPT неделно, OpenAI би можел да добие директен увид во вредните податоци за корисниците, што е клучен извор на приходи за Google, кој користи податоци собрани преку Chrome за попрецизно рекламирање, објаснува Ројтерс.