Сервисирање на технички производи претставува најчестиот проблем што граѓаните го пријавувале во Организацијата на потрошувачи на Македонија (ОПМ) во првиот квартал од 2015 година.
Во овој период беа извршени 479 советувања од кои 35 лично, 283 по пат на телефон и 161 по пат на електронска пошта. Од советувањата 436 беа општо правни, а 43 специјалистички (храна, права на пациенти, финансиски услуги и домување).
“Повторно како и лани, најчест проблем на граѓаните беше сервисирањето на техничките производи, каде што пред сè стануваше збор за проблеми со сервисирање и гаранција на мобилни телефони, а во одреден број и за лап топ и десктоп компјутери, како и за телевизори и други технички апарати за секојдневна употреба. Проблемите со производите од бела техника и други видови на технички производи беше помал, најчесто потрошувачите се жалеа на проблеми со мали кујнски апарати, клима уреди и грејни тела“, стои во соопштението на Организацијата за заштита на потрошувачи.
Во доменот на производи за домот, поплаките најчесто беа во поглед на изработка и испорака на мебел, каде што потрошувачите се жалеа дека чекаат со месеци производ за кој било договорено да биде испорачан за 30 дена или помалку, или дека производот кој го добиле е со многу лош квалитет, или дека воопшто не содејствува со порачаното.
Во доменот на производи за лична употреба најчесто потрошувачите се жалеа за обувки и облека, особено проблеми со враќање на овие производи иако биле неупотребени, проблеми со оштетување на производот во гарантен рок и сл.
За разлика од претходните извештаи, во овој период се забележува зголемен број на проблеми со телекомуникациските услуги, особено користењето на услугите од операторите кои нудат телевизиски пакети. Проблемот беше најзастапен во почетокот на 2015-та година, кога дојде до исклучување на дел од програмите во телевизиските пакети. Граѓаните реагираа на ваквите одлуки на операторите кои ги променија каналите кои до тогаш ги нуделе. Потрошувачите бараа раскинување на договорите, при што настана проблем поради немањето основ за раскинување, поради тоа што телевизиските пакети т.е. точно наведените канали не беа дел од договорите. ОПМ реагираше до надлежните органи за пронаоѓање на начин за решавање на овој проблем со кој се соочуваат потрошувачите. По реакција на потрошувачите агенцијата за електронски комуникации донесе правилник со кој операторите се обврзани да склучат нов договор со потрошувачот, каде ќе се обврзат да исполнат одредени канали кои се во пакетот, а при промена на пакетот, потрошувачот ќе има право да го раскине договор, без да плати казнени пенали.
Следен најчест проблем со кој се соочија потрошувачите во изминатиот период беа превисоки сметки за електрична енергија, поради често вршење на механичка пресметка на електричната енергија, со што се прави просек на потрошената енергија, а не се пресметува точно потрошената електрична енергија во изминатиот месец.
“Потрошувачите се жалеа дека ваквиот начин на мерење им создава голем проблем поради тоа што се случуваат големи отскокнувања во сметките од месец во месец. Одреден месец им стигнува сметка поголема за неколку пати, па потоа неколку месеци плаќаат симболични суми (порамнување). Тие велат дека ваквиот начин на наплата им преставува голем проблем во планирањето на семејниот буџет, а особено овој проблем се јавува кај ранливите категории на граѓани“, велат од ОПМ.
Понатаму, во делот на услугите најголем дел на поплаки на потрошувачите имаше за туристичките аранжмани, особено во периодот по новата година и за време на празниците кога најчесто се патува. Потрошувачите се соочуваа со ненадејно откажување на аранжманите од страна на туристичката агенција, со неисполнување на дел од аранжманот и т.н.
Во делот на услугите на ниво на Град Скопје, најчесто поплаките се однесуваа на испораката на топлинската енергија, односно одредени реони имаа подолги прекини и потрошувачите не ја добиваа услугата поради дефекти во системот за кои требаше долг временски период да се санираат. Тие во тој период користеа дополнително греење за што бараа да бидат сразмерно обесштетени.
Во делот на специјалистичките советувања најголем број на поплаки имаше во доменот на храната, особено за декларирањето на прехранбените производи. Потрошувачите се жалеа дека производите немаат македонска декларација на кирилско писмо, дека се сомневаат во манипулации со гарантниот рок на производот.
Помал дел на поплаки имаше за финансиските услуги, проблеми со кредити и пресметување на камати, или проблеми со трансакциските сметки. Исто така, во мал број имаше поплаки за здравствените услуги и домување.
Во сите наведени случаи граѓаните беа упатувани на кој начин да го решат проблемот, иако одредени проблемите се јавуваа поради услови кои ги поставуваат регулаторните тела, каде е потребно тие да преземат активности согласно реакциите на граѓаните.
