Откупени 7 милиони килограми тутун за просечна цена од 156 денари по килограм

Директорот на Државниот инспекторат за земјоделство, Румен Стаменов, информираше дека досега се откупени седум милиони килограми тутун по просечна цена од 156 денари за килограм или 17% од годинешната реколта.
“Интересно е што од откупените 17%, 4,7% се од првата класа, а од четвртата класа се околу 5%. Тоа ни покажува дека најквалитетниот тутун се уште не е откупен и дека вистинските резултати ќе ги имаме по 15 март, кога завршува и откупната сезона”, изјави Стаменов на средбата со струмичките тутунопроизводители.
Стаменов апелираше до компаниите за откуп да ја засилат динамиката за откуп по Божиќ, а тутунарите да го искористат убавото време за калапење и предавање на тутунот.
“Упатувам апел до компаниите да ја забрзаат динамиката на откупување на тутунот, бидејќи последниот рок е 15 март, а истиот нема да биде продолжен”, додаде Стаменов.
Стаменов информираше и дека досега на откупните пунктови во струмичкиот регион, Второстепената комисија за проценка била повикана во 120 сличаи, при што во 40% од случаите ја зголемила проценетата класа, што укажува дека откупувачите ги вршат проценките во рамките на законските норми.