Милијардерите ширум светот ја „ограбуваат планетата“ и го ставаат светот во „сериозна опасност“ од климатските промени, предупредуваат активистите.
Џејми Ливингстон, шеф на Oxfam, откри нова студија која покажа дека до крајот на оваа деценија, јаглеродниот отпечаток на најбогатите 1 процент во светот ќе биде 30 пати поголем од она што е потребно за да се одржи глобалното затоплување под 1,5 степени Целзиусови.
Авторите на извештајот ги повикаа владите да преземат мерки за ограничување на „луксузната потрошувачка на јаглерод, како што се мега јахти, приватни авиони и вселенски патувања“.
Истражувањето доаѓа откако основачот на Amazon, Џеф Безос беше на кратко вселенско патување претходно оваа година, Сер Ричард Бренсон отпатува до работ на вселената со својот ракетен авион, а приватната компанија за вселенски патувања Space X на Елон Маск развива средство за транспортирање луѓе на Марс.
Сепак, научниците велат дека за да се постигне целта договорена на самитот за климата во 2015 година, секој човек треба да ги ограничи своите емисии на CO2 на само 2,3 тони до 2030 година, приближно половина од денешниот јаглероден отпечаток.
Новата студија на Oxfam, заснована на истражувањето на Институтот за европска еколошка политика (IEEP) и Стокхолмскиот институт за животна средина (SEI), покажа дека 1 процент од најбогатите луѓе ќе ја надминат таа граница за 30 пати.
Таа група на луѓе, помала од населението на Германија, ќе учествува со 16 отсто од вкупните емисии до 2030 година, што е повеќе од 13 отсто во 1990 година и 15 отсто во 2015 година.
Вкупните емисии генерирани само од 10 проценти од најбогатите би можеле да бидат доволни за да ја надминат границата за затоплување од 1,5 степени Целзиусови до 2030 година, без оглед на тоа што прават другите 90 проценти од луѓето.
„Луксузниот начин на живот и постојаниот грабеж на планетата од страна на најбогатите луѓе во светот не ставаат во зголемена опасност“, рече Ливингстон, шеф на Oxfam, меѓународна организација која се бори против сиромаштијата.
„Емисиите на само еден лет во просторот на милијардер се поголеми од вкупната емисија што ја испушта некој што е меѓу најсиромашните милијарди луѓе на земјата во текот на животот“, додаде тој.
„Никој не е имун на ефектите од климатската криза, но најсиромашните во светот се оние кои плаќаат највисока цена и покрај тоа што придонесуваат најмалку додека се борат со поплавите, гладот и циклоните во исто време“, рече Ливингстон.
Студијата беше објавена за време на климатскиот самит COP26 во Глазгов, каде земјите разговараат за тоа како најдобро да се ограничат емисиите. Ливингстон рече дека масовниот собир е „момент на вистината во борбата против климатските промени“.
„Глобалните лидери мора да се договорат како да ги ограничат прекумерните емисии и глобалното затоплување. Мора да го направат тоа овде и сега во Глазгов. Одложувањето чини животи“, предупреди лидерот на Oxfam.
