На светските пазари, цените на нафтата паднаа минатата недела, по пет недели раст, а трговците се фокусираа на подготовките за преговори меѓу САД и Иран за иранската нуклеарна програма.
Цената на барел на лондонскиот пазар минатата недела падна за 3,7 проценти, на 68,05 долари, додека на американскиот пазар, барелот падна за 2,5 проценти, на 63,55 долари. По пет недели раст, цените на нафтата паднаа минатата недела, бидејќи тензиите меѓу САД и Иран донекаде се намалија.
Американскиот претседател Доналд Трамп неодамна се закани со напад врз Иран, барајќи од Техеран да се откаже од збогатувањето на ураниум, што е можен пат до нуклеарна бомба.
Техеран, од друга страна, негира дека има намера да развие нуклеарно оружје, но американската морнарица се собира во регионот, што претставува притисок на Вашингтон врз Техеран. Минатата недела, пазарите ги следеа подготовките за состанокот меѓу иранските и американските преговарачи. Службениците конечно разговараа во петокот со посредство на оманската дипломатија, а преговорите ќе продолжат во наредните денови.
Индикациите за долготрајни преговори ги вознемирија трговците со нафта кои сакаа брзо решение и отстранување на заканата за снабдувањето од регионот на Блискиот Исток. Тие стравуваат дека како одговор на евентуален американски напад, Иран би можел да го затвори Ормутскиот теснец, низ кој минуваат 20 милиони барели нафта дневно.
„Пазарот се движи напред, назад во зависност од вестите за преговорите. Еден ден ситуацијата изгледа подобро, следниот ден полошо… Нервозата околу Иран ќе продолжи“, објаснува Џон Килдаф, партнер во „Ајџан Капитал“. Ако ситуацијата се влоши, цените на нафтата ќе растат. А ако тензиите се намалат, цените на нафтата дополнително ќе паднат, вели Килдаф. Главно поради геополитичките тензии, цените на нафтата се зголемија за околу 12 проценти од почетокот на годината, откако минатата година паднаа за околу 20 проценти.