Во саботата наутро цената на нафтата WTI, референтната за американскиот пазар, беше 72,28 долари, а нафтата од типот брент 77,33 долари за барел, со што продолжи падот, објави Oil Price.
Цената на нафтата падна на 77 долари на меѓународните пазари во петокот под притисок на трговците загрижени за кинеската побарувачка и стравувањата дека централните банки во водечките економии би можеле да го одложат олеснувањето на условите за финансирање.
На лондонскиот пазар цената на барелот по пладне беше за 1,4 долари пониска во однос на затворањето на трговијата во четвртокот и изнесуваше 77,3 долари. Во четвртокот го затвори тргувањето со загуба од 1,85 долари.
На американскиот пазар барелот во петокот се тргуваше по пониска цена од 1,59 долари, по 72,23 долари. Во четвртокот го заврши тргувањето со загуба од 2,03 долари, пренесува Мина, повикувајќи се на SEEbiz.
Пазарите во четвртокот ги потресе затворањето на големата рафинерија во Соединетите Американски Држави (САД) која преработува 435.000 барели дневно, поради проблеми во снабдувањето со електрична енергија.
Во петокот вниманието повторно се сврте кон монетарната политика на водечките економии. Трговците проценуваат кога централните банки би можеле да ги намалат каматните стапки, што би ја поттикнало економијата и побарувачката за нафта.
Американската централна банка, Федералните резерви (ФЕД), оваа недела ги задржа каматните стапки во опсег од 5,25 до 5,5 отсто, а претседателот Џером Пауел во средата рече дека ќе ги намали во наредните месеци.
На крајот на неделата, инвеститорите стравуваа дека ФЕД може да ја одложи таа одлука откако извештајот на Министерството за труд покажа стабилно темпо на вработување во јануари.
И претставник на Европската централна банка во петокот рече дека не треба да се брза со намалување на каматните стапки.
На почетокот на неделата, пазарите беа потресени со судски налог во Хонг Конг за ликвидација на презадолжената кинеска компанија за недвижности Евергранде. Градежниот сектор сочинува приближно една четвртина од кинескиот бруто-домашен производ (БДП), така што продлабочувањето на кризата на пазарот на недвижности може да ја намали економската активност и побарувачката за нафта.