Компаниите во Германија значително ги намалија своите инвестициски планови оваа година, според извештај објавен денес од Институтот за економски истражувања (Ifo) од Минхен.
Вредноста на индексот, кој ги мери инвестициските очекувања на германските компании, е минус 9,2 поени во ноември, што е значително влошување во споредба со март, кога беше во плус од 2,4 поени.
Според аналитичарката на Ifo, Лара Каргес, причината е длабока структурна промена и пад на привлечноста на Германија како бизнис дестинација, заедно со дополнителна неизвесност во економската политика што ја зголемува претпазливоста на компаниите.
Најголем пад на очекувањата е забележан во германската преработувачка индустрија, каде што вредноста на индикаторот падна на минус 17,3 поени, а значително влошување е забележано во автомобилскиот сектор, хемиската индустрија и машинското инженерство.
Плановите за 2026 година се исто така песимистички, бидејќи вредноста на индексот што ги мери инвестициските очекувања на германските фирми за следната година е минус 3,1 поен.
Во преработувачката индустрија, очекувањата за 2026 година остануваат под нулата, на минус 6,9 поени, а хемиските компании се највнимателни.
За разлика од претходните години, германската автомобилска индустрија сега планира да ги намали инвестициите во софтвер и истражување и развој, но малку да ги зголеми инвестициите во опрема, според веб-страницата на Ifo.