На седум германски аеродроми во четвртокот вечерта почна 24-часовен штрајк инициран од германскиот синдикат Верди.
Штрајкот е инициран поради неуспешниот договор за колективен договор и зголемувањето на платите во јавниот сектор на аеродромите, пренесува магазинот Феникс.
Продолжува хаосот во германскиот воздушен сообраќај. Според проценките на аеродромското здружение АДВ, речиси 300.000 патници ќе бидат погодени од откажување на летовите овој петок, бидејќи синдикатот Верди најави еднодневен штрајк на седум германски аеродроми.
Аеродромите во Франкфурт, Минхен, Штутгарт и Хамбург најавија дека ќе ги прекинат редовните патнички линии цел петок. Новиот штрајк сигурно ќе предизвика многу проблеми на патниците поради откажување на летовите.
Верди и Здружението на државни службеници ДББ во преговорите бараат 10,5 отсто поголема плата, односно најмалку 500 евра повеќе за околу 2,5 милиони вработени во државниот и локалниот јавен сектор.
Времетраењето на предложениот нов колективен договор е дванаесет месеци. Работодавците досега ги одбиваа барањата на синдикатот.
Втората рунда преговори е закажана за 22 и 23 февруари во Потсдам. Понудата од работодавачот се уште не е пристигната, пренесува германската новинска агенција (dpa).
Здружението на германските аеродроми соопшти дека околу 295.000 патници ќе бидат погодени од откажувањето на околу 2.340 летови на аеродромите во Бремен, Дортмунд, Франкфурт, Хамбург, Хановер, Минхен и Штутгарт.
Верди ги повика вработените истовремено на штрајк за да се зголеми притисокот врз управата на аеродромот да се согласи со нивните предлози.
„Штрајковите немаат никаква врска со предупредувачките штрајкови“, рече претседателот на индустриската асоцијација BDL и шеф на аеродромот во Минхен, Јост Ламерс. „Верди тука целосно ја надминува границата и го спроведува тарифниот конфликт на грбот на патниците“, пренесува dpa.
Фото: Facebook
