Во индустриската зона Неокази, во Пробиштип, почнува со работа фабриката Кранфилд Фаундри, информираат од македонската влада. Компанијата ќе се занимава со производство и обработка на одлеаноци од сиво и нодуларно железо.
“Компанијата ги ангажираше Гемко Каст Метал Технолоџи од Холандија, светски лидер специјализиран за проектирање и инженеринг на нови капацитети за производство и обработка на производи од железо, ДИСА (DISA) од Данска и АБП (ABP) од Германија за технологија и машини, како и мултинационалната компанија Donaldson со седиште во САД, за филтрациски систем за заштита на работната средина“, рече премиерот Зоран Заев.
Во овој момент во фабриката се вработени 58 лица, а се очекува нивниот број да достигне 300.
Инаку, Кранфилд Фаундри е компанија за производство и обработка на одлеаноци од сиво и нодуларно железо, којашто употребува исклучително само електрична енергија. Во процесот на работа строго е забрането употреба на суровини кои содржат штетни материи, за да може да се испорача производ којшто ги задоволува сите стандарди за квалитет, безбедност и заштита на животната средина.
Станува збор за инвестиција којашто, како што се наведува, не е трудоинтензивна, односно станува збор за капитално интензивна инвестиција којашто вработува високо стручни луѓе.
“Станува збор за високо технолошки автоматизирана линија за калапирање, а потоа и леење на челик, од којшто ќе се произведуваат делови коишто се наменети за градежништвото, пред сѐ, за автомобилската индустрија во иднина, како и за други различни намени. Кранфилд Фаундри е извозно ориентирана компанија, што е добро, затоа што ќе носи дополнително додадена вредност во нашата држава“, рече вицепремиерот Кочо Анѓушев.
