Поранешна менаџерка го тужи Фејсбук за ширење омраза и дезинформации

17

Научникот за анализа на податоци, Френсис Хоген, која како гостин на Си -Би -Ес откри дека е “свиркач“ во Фејсбук, тврди дека во секој конфликт помеѓу јавното добро и она што е од корист за компанијата, една од најголемите социјални мрежи би ги избрала сопствените интереси, пренесе АП.

Таа, како гостин во емисијата “60 минути“, потврди дека анонимно поднела тужба до федералните власти за спроведување на законот во која се повикува на нејзиното истражување кое докажува ширење омраза и дезинформации преку Фејсбук.

Хоген, која работела во Гугл и Пинтрест пред да се приклучи на Фејсбук во 2019 година, рече дека откако се приклучила на компанијата, аплицирала за работа во секторот што се занимава со борба против дезинформации, бидејќи изгубила пријател поради теории на заговор на Интернет.

“Фејсбук секогаш покажуваше дека избира профит наместо безбедност“, рече Хоген, која ќе сведочи пред Конгресот оваа недела.

Според неа, Фејсбук предвреме ги отфрлил заштитните мерки дизајнирани да спречат дезинформации и бунт откако Џо Бајден го победил Доналд Трамп минатата година, тврдејќи дека тоа придонело за смртоносната инвазија на Капитол Хил на 6 јануари.

По изборите, компанијата ја распушти единицата за граѓански интегритет во која работеше. Тие следеа алгоритми кои управуваат со она што е прикажано на фидовите за вести на корисниците и проверуваа како тие фаворизираат содржини кои промовираат омраза.

Хоген поднесе најмалку осум тужби до федералните власти на САД во кои се тврди дека Фејсбук го прекршил законот со негирање на информации за ризиците што ги носи неговата социјална мрежа, беше објавено во емисијата “60 минути“. Фејсбук, пак, би можел да преземе правни дејствија против неа доколку се открие дека украла доверливи информации од компанијата.

Годишните приходи на Фејсбук повеќе од двојно се зголемија од 56 милијарди долари во 2018 година на предвидени 119 милијарди долари оваа година, врз основа на проценките на аналитичарите што ги разгледа Фактсет. Во меѓувреме, пазарната вредност на компанијата се зголеми од 375 милијарди долари на крајот на 2018 година на речиси 1.000 милијарди долари денес.

Уште пред да биде објавено целото интервју во неделата, еден од извршните директори на Фејсбук ги исмејуваше тврдењата на “свиркачот“ како “погрешни“, пренесе АП.

“Социјалните мрежи имаа големо влијание врз општеството во последниве години, и Фејсбук често е местото каде што се одржуваат повеќето од овие дебати“, напиша Ник Клег, потпретседател за политика и јавни работи, во писмото испратено во петокот.
Постоечките докази едноставно не ја поддржуваат идејата дека Фејсбук или социјалните мрежи воопшто се примарната причина за поларизација, додава тој.

Интервјуто “60 минути“ на Си -Би -Ес, во кое гостуваше Френсис Хоген, дополнително го засилува вниманието на Фејсбук, бидејќи законодавците и регулаторите ширум светот ја испитуваат огромната моќ на социјалните мрежи да формираат мислења и поларизирачки ефекти врз општеството.

Вол Стрит Журнал неодамна, повикувајќи се на експертски преглед на внатрешните документи на компанијата, објави дека Фејсбук ги ублажил негативните ефекти од нејзината апликација Инстаграм врз младите корисници и лошо реагирал на предупредувањата на вработените за начинот на кој платформата ја користат трговците со луѓе во земјите во развој.