Поранешниот извршен директор на Ауди, Руперт Штадлер, е подготвен да ја признае својата улога во „дизелгејт“ во замена за условна казна и исплата од 1,1 милион евра, изјавија тој и неговиот правен тим во средата.
На Штадлер му се суди за измама од 2020 година за неговата улога во скандалот во кој матичните компании Фолксваген и Ауди во 2015 година признаа дека користеле нелегален софтвер за фалсификување податоци за емисиите.
Адвокатите на Шталдлер рекоа дека ќе дадат изјава на 16 мај, по што судијата ќе одлучи дали се работи за целосно признание и ќе донесе пресуда во јуни. Не беше јасно дали Штадлер ќе ја поднесе изјавата лично или преку неговите адвокати.
Со договорот се согласија и обвинителите. Судијата рече дека Штадлер (60) се соочува со затворска казна од една и пол до две години, која ќе биде суспендирана доколку Штадлер ја признае вината.
Судењето е една од најистакнатите правни постапки што произлезе од „дизелгејт“ во Фолксваген и неговата подружница Ауди. Доказите дека податоците од милиони тестови за емисии биле фалсификувани се појавија во септември 2015 година.
Според обвинителите, инженерите манипулирале со моторите така што тие ги исполнувале законските вредности за емисиите на тест-клупата, но не и на патот. Штадлер е обвинет дека по избивањето на скандалот не ја спречил продажбата на автомобили со фалсификувани податоци.
На Штадлер му се суди заедно со поранешниот директор на Audi Волфганг Хац и еден инженер. Хац и инженерот признале дека ги фалсификувале податоците за моторот.
Audi одби да коментира, велејќи дека не е страна во тужбата.
Договорот дојде откако одбраната на Штадлер, обвинителите и судот постигнаа договор, особено за тоа колку Штадлер ќе плати во замена за условна казна.
Обвинителите бараа два милиони евра, наведувајќи ги платите на Штадлер во Ауди и Фолксваген, како и неговите финансиски средства и недвижен имот. Тимот на Штадлер првично тврдеше дека 1,1 милион евра се превисоки бидејќи тој моментално нема приходи и се соочува со високи правни трошоци.
Фото: Facebook
