Цените на нафтата пораснаа во вторник откако САД и Кина ја продолжија паузата во зголемувањето на царините, ублажувајќи ги загриженостите дека ескалацијата на трговскиот спор би можела да им наштети на нивните економии и да ја намали побарувачката за горивото кај двата најголеми потрошувачи на нафта во светот.
Фјучерсите за сурова нафта од типот Брент пораснаа за 26 центи на 66,89 американски долари (околу 60,79 евра) за барел, додека фјучерсите за сурова нафта од типот WTI пораснаа за 22 центи на 64,18 американски долари (околу 58,35 евра).
Американскиот претседател Доналд Трамп го продолжи царинското примирје со Кина за дополнителни 90 дена, изјави во понеделник функционер на Белата куќа, избегнувајќи воведување троцифрени царини за кинески стоки, додека американските трговци се подготвуваат за клучната празнична сезона на крајот од годината.
Овој потег, како што оцени CNBC, ги поттикна надежите дека двете најголеми економии во светот би можеле да постигнат поширок договор и да избегнат речиси целосно трговско ембарго. Царините претставуваат ризик од забавување на економскиот раст, што би можело да ја ослабне глобалната побарувачка за гориво и да ги намали цените на нафтата.
Инвеститорите се фокусирани и на средбата меѓу Трамп и рускиот претседател Владимир Путин на 15 август во Алјаска, која треба да се искористи за преговори за прекин на војната во Украина.
Средбата доаѓа во услови на зголемен притисок од САД врз Русија, со закани за построги санкции врз руските купувачи на нафта како што се Кина и Индија доколку не се постигне мировен договор – што би можело да ги наруши глобалните текови на трговија со нафта.
„Секој мировен договор меѓу Русија и Украина би го отстранил ризикот од прекини во снабдувањето со руска нафта што се наѕираат над пазарот“, напиша во белешка Даниел Хајнс, виш стратег за стоки во ANZ.
Трамп го постави минатиот петок како краен рок за постигнување мир, предупредувајќи дека купувачите на руска нафта ќе се соочат со секундарни санкции, а во исто време изврши притисок врз Индија да го намали увозот на руска нафта.