Германската холдинг компанија „Порше СЕ“ забележа загуба од 923 милиони евра во првиот квартал, првенствено поради отпишувањето на нејзиниот удел во групацијата „Фолксваген“ во износ од 1,3 милијарди евра, објави автомобилската компанија во среда. Компанијата со седиште во Штутгарт, сепак, забележа малку помала загуба отколку во истиот период минатата година, кога загубата изнесуваше 1,08 милијарди евра.
Холдинг компанијата, контролирана од семејствата Порше и Пих, е под притисок од забавувањето на побарувачката во автомобилската индустрија и неповолните пазарни услови што влијаат и на Фолксваген и на производителот на спортски автомобили Порше АГ.
Извршниот директор Ханс Дитер Печ изјави дека компанијата, доколку се исклучат отписите, остварила профит на консолидирана основа и дополнително ја зајакнала финансиската структура. „Во исто време, бизнис моделите што долго време успешно ги поддржуваа нашите клучни инвестиции сега треба да се прилагодат на новите околности“, рече Печ.